18 ოქტომბერს თბილისის მახლობლად გაიმართა საქველმოქმედო სახელოვნებო ღონისძიება «Pirosmani: Once Again!», რომელმაც გააერთიანა დიპლომატები, ხელოვანები და საზოგადოების წარმომადგენლები მნიშვნელოვანი მიზნის — უკრაინის ჰუმანიტარული განაღმვის მხარდასაჭერად.

საღამოს ცენტრალური მოვლენა გახდა უკრაინელი მხატვრის, სიმა ვასილიევას ნამუშევრების გამოფენა და საქველმოქმედო აუქციონი. კრამატორსკში დაბადებულმა ხელოვანმა, რომელიც ამჟამად დიდ ბრიტანეთში ცხოვრობს და მოღვაწეობს, წარმოადგინა ტილოები, რომლებიც შთაგონებულია გამოჩენილი ქართველი მხატვრის, ნიკო ფიროსმანის შემოქმედებით. ეს სახელოვნებო პროექტი უკრაინას, საქართველოსა და გაერთიანებულ სამეფოს შორის კულტურული დიალოგისა და მტკიცე კავშირების ნათელი მაგალითი გახდა. 

საღამოს პროგრამას აფორმებდა მუსიკალური გამოსვლები და ქართული კულტურული ტრადიციების გაცნობა. იმისათვის, რომ საქველმოქმედო ინიციატივას მსოფლიოს ნებისმიერი წერტილიდან შემოუერთდნენ, ორგანიზატორებმა ასევე აამუშავეს ონლაინ-აუქციონი GalaBid პლატფორმაზე, რომელიც ამ დრომდე გრძელდება.

ღონისძიება ჩატარდა საერთაშორისო საქველმოქმედო ფონდ GRACE-ის მხარდასაჭერად, რომლის საქმიანობის ერთ-ერთი მიმართულება უკრაინის ჰუმანიტარული განაღმვაა. ფონდი ასევე მუშაობს ომით დაზარალებული ტერიტორიების ეკოლოგიურ აღდგენაზე, ნაღმსაწინააღმდეგო საქმიანობაში თანამედროვე ტექნოლოგიების დანერგვასა და საერთაშორისო ექსპერტების მხარდაჭერის მოზიდვაზე. 

ღონისძიებაზე ფონდ GRACE-ს წარმოადგენდა ვალერი ლევინი (Valerie Levin) — ფონდის გამგეობის წევრი, წარმოშობით უკრაინელი, რომელიც დიდ ბრიტანეთში ცხოვრობს.

ღონისძიებაში მონაწილეობა მიიღეს უკრაინის საქმეთა დროებითმა რწმუნებულმა საქართველოში დმიტრო ბერეჟნიმ, უკრაინის საელჩოს თავდაცვის, სამხედრო-საზღვაო და სამხედრო-საჰაერო ატაშემ პოლკოვნიკმა სერგი ხორტმა, დიდი ბრიტანეთის ელჩმა საქართველოში გარეთ უორდმა, აგრეთვე დიპლომატიური კორპუსის, ქართული პოლიტიკური და კულტურული წრეების წარმომადგენლებმა.

განსაკუთრებული მადლობა მაკო აბაშიძეს ინიციატივისთვის, საქმისადმი ერთგულებისა და ამ ღონისძიების ორგანიზებაში შეტანილი მნიშვნელოვანი წვლილისთვის. გულწრფელ მადლობას ვუხდით ყველა ორგანიზატორს, ხელოვანსა და სტუმარს უკრაინისადმი სოლიდარობისა და უკრაინული მიწების უსაფრთხოების აღდგენისკენ მიმართული ძალისხმევის მხარდაჭერისთვის! 

ერთად ვაახლოებთ მომავალს, სადაც უკრაინული მიწა თავისუფალი იქნება ნაღმებისგან, ხოლო ადამიანების სიცოცხლე — უსაფრთხო.